Муфтият балаларға аяғын уқалатқан Әбдіжаппар Смановқа қатаң ескерту жасады

Қазақстан мұсылмандары діни басқармасы (ҚМДБ) Сарыағаштағы медреседе түсірілген даулы видеоға байланысты ұстаз Әбдіжаппар Смановқа ескерту жасады. Бұған дейін әлеуметтік желіде оның аяғын балалар уқалап жатқаны түсірілген бейнежазба тараған болатын, деп хабарлайды Orda.kz.

Orda.kz редакциясы Түркістан облысының білім басқармасынан түсініктеме алды. Шенеуніктер тексеріс жүргізіп үлгерді.

«Бұл намаздан кейінгі таң уағыз кезінде болған. Абдіжаппар Смановтың аяғын уқалағандар медресе шәкірттері емес, оның немерелері мен жиендері болған. Олар әрқашан атасына құрмет көрсетіп, бата сұрап, ізет білдіреді»,  деп хабарлады ведомстводан.

Осы оқиғаға қатысты Қазақстан мұсылмандары діни басқармасы мәлімдеме жасады.

«Мешіт – құлшылық үйі, жамағат жиналатын рухани орда, қасиетті мекен, тәрбие орны. Құлшылық үйіне келген адам мешіт әдебін сақтауы тиіс. Бұл – мұсылманның көркем мінезінің бір белгісі. Түркістан облысы Сарыағаш ауданындағы мешітте болған оқиға әлеуметтік желілерде тарап, қоғамда түрлі пікір қайшылығын тудырды. Осыған орай, Қазақстан мұсылмандары діни басқармасы мешітте қоғам наразылығын тудырған әрекетке жол бергені үшін имамға ескерту жасады»,  деп мәлімдеді басқарма.