More Life қорының директоры ұсталды

Ақтөбеде қайырымдылық қорының директоры 30 миллион теңге алаяқтық жасады деген күдікке ілінді.

Бұл туралы Ішкі істер министрлігі хабарлайды.

Ақтөбенің бірнеше тұрғыны «More Life» қорының өкілдеріне қатысты арызбен полицияға хабарласты. Зардап шеккендердің айтуынша, қор директоры емделуге қаражат жинауға көмектесеміз деген желеумен жиналған ақшаны иемденіп алған.

«Қылмыстық іске алты жәбірленуші тартылды, 2023 жылы бір оқиға бойынша қор мен емделуге мұқтаж баланың ата-анасы арасында 30 миллион теңгеден астам шығын өндірілді. Қажетті соманы жинап алған соң қор баламен бірге ата-анасын Беларусь Республикасының Минск қаласына емделуге жібереді. Нәтижесінде бала тиісті жағдайда емделмеген, ал баланың ата-анасы басқа елде көмексіз қалды» деді полиция.

Алаяқтық фактісі бойынша сотқа дейінгі тергеу амалдары жүргізілуде. Тергеу аясында жедел-іздестіру шараларын жүргізуге халықаралық бұйрық жіберілді. Күдікті уақытша ұстау изоляторына қамалды.