Парламент жер туралы заңға жаңа түзетулер қабылдады

Ауылшаруашылық жерлерін сатуға арналған мораторий 2026 жылдың 31 желтоқсанына дейін ұзартылды. Мұндай норма Сенаттың бүгінгі пленарлық отырысы барысында екі оқылымда қабылдаған «Қазақстан Республикасының кейбір заңнамалық актілеріне жер қатынастарын дамыту мәселелері бойынша өзгерістер мен толықтырулар енгізу туралы» заң жобасында белгіленген.

Бұл туралы Orda.kz хабарлайды.

— Бұл заңда жерді ұтымды және мақсатты пайдалану бойынша жаңа нормалар қарастырылған. Қазақстандықтарға ауыл шаруашылығы жерлерін жекеменшікке беру жөніндегі Жер кодексінің нормаларын қолдануға мораторий ұзартылады. Құжатқа, жайылымдық жерлерді пайдалану мәселелерін реттейтін жаңа нормалар енгізілген. Ол жер учаскелері бойынша ақпараттың қолжетімділігі мен ашықтығын қамтамасыз етеді, - деді Сенат төрағасы Мәулен Әшімбаев.

Айта кетейік, заңда конкурсқа шығарылатын жер телімдерінің шекті мөлшері жазылған. Тым үлкен учаскелердің конкурсқа қатысуына тыйым салынады. Ауылда кемінде бес жыл тұрған адамдар ауыл шаруашылығы жерлерін беру жөніндегі конкурстарда артықшылыққа ие болады, оларға қосымша ұпайлар есептеледі.