Молдова «ядролық апат» жағдайына шаралар қолдана бастады

Молдова Денсаулық сақтау министрлігі Запорожье атом электр станциясында «ядролық апат» орын алған жағдайда ел аймақтарына 1 миллион таблетка калий йодидін тарату туралы шешім қабылдады.

Бұл туралы Кишинев қалалық медициналық-әлеуметтік көмек бас басқармасының басшысы Борис Гылкэ айтты.

Оның айтуынша, радиоактивті заттардың бөлінуінен қауіп төнген жағдайда қорғайтын тиісті дәрі-дәрмек мемлекет азаматтары арасында таратылады.

— Бұл азаматтар дәріге тәуелді болу  керек дегенді білдірмейді. Тек қауіп төнген жағдайда және төтенше қоғамдық денсаулық сақтау комиссиясының шешімімен азаматтар арасында дәрілер таратылады, - деп түсіндірді Гылкэ.

Кишинев билігі өкілінің мәлімдемесі Запорожье АЭС аумағын атқылаудың жалғасуы себебінен пайда болды. Бірқатар БАҚ мұндай жағдай өткен ғасырдың 80-жылдарындағы Чернобыль АЭС-індегі апатқа ұқсас «ядролық апатқа» әкелуі мүмкін екенін бірнеше рет атап өтті. Бұл ретте ықтимал оқиғаның салдары шекарасы ЗАЭС-тен небәрі 400 шақырым жерде орналасқан Молдоваға әсер етуі мүмкін.

Бұған дейін МАГАТЭ басшысы Рафаэль Мариано Гросси атом энергиясы агенттігінің сарапшылар миссиясын Запорожье АЭС-ке шұғыл түрде жіберу қажеттігін мәлімдеген.