Молдова орыстілді телеарналар лицензиясын қайтарып алды

Молдованың Төтенше жағдайлар жөніндегі комиссиясы хабар тарату лицензияларын тоқтату туралы шешімді ел билігінің қоғамдық пікірді бұрмалау әрекеттерінің алдын алуды қалайтынымен түсіндірді.

Молдова орыстілді арналарды көрсетуді тоқтатады. Елдің Төтенше жағдайлар жөніндегі комиссиясы (Ресей-Украина соғысы басталғаннан кейін құрылған) лицензияларды қайтарып алды. Anadolu жазғандай, нәтижесінде Молдовада «Первый в Молдове», «РТР-Молдова», Accent TV, «НТВ-Молдова», TV6 және  «Оргеев» арналары аумақта хабар таратуды тоқтатады.

Комиссия мұны арналардың Украинадағы соғыс туралы жалған ақпарат таратуымен дәлелдеген. Комиссия мүшелері жүргізген зерттеу нәтижелеріне сәйкес, арналар «өз хабарларында халықаралық оқиғалар мен Украина соғысы туралы толық емес ақпарат берген».

«Телехабар тарату лицензияларын тоқтату туралы шешім «қоғамдық пікірді бұрмалау және жалған ақпаратты тарату әрекеттерінің алдын алу» мақсатында қабылданды»  деп атап өтті комиссия.

Хабар тарату арналарына лицензияның тоқтатылуын құптай отырып, Молдова президенті Майя Санду «елді тұрақсыздандыру әрекеттерінің алдын алу үшін маңызды қадам жасалғанын» атап өтті.

Дегенмен, TV6 арнасы Facebook желісіндегі аккаунтында бұл шешімді «мүлдем негізсіз» және «сөз бостандығына бұрын-соңды болмаған шабуыл» деп атады.

Ал Ресей Сыртқы істер министрлігінің баспасөз хатшысы Мария Захарова «Молдаваның миллиондаған орыстілді тұрғындары өздеріне ұнайтын жаңалықтар көзінен айырылғанын» айтты. Ол мұны «Молдавадағы азшылықтардың құқықтарын дөрекі түрде бұзу» деп бағалады.