Молдавада «орыс үйі» жабылады

Молдовадағы «орыс үйі» жабылады, бұл туралы Молдава сыртқы істер министрлігі мәлімет таратты, деп хабарлайды Orda.kz. 

Молдова билігінің мұндай шешімге келуіне Ресейдің әскери мақсаттағы дрондары елдің әуе кеңістігін бұзғаны түрткі болған. Сондықтан министрлік екі ел үкіметі арасындағы мәдени орталықтар құру және олардың жұмыс істеуі туралы 1998 жылы жасалған келісімді біржақты тоқтату туралы шешім қабылдады. 

Келісімді тоқтату процедурасы аяқталғаннан кейін Ресейдің мәдени орталығы елдегі жұмысын тоқтататыны белгілі болды.

Бұған дейін Молдова президенті Майя Санду Ресей дрондары Украинаның Одесса облысына шабуыл жасаған кезде екі дрон Молдова аумағына ұшып кетіп, сонда жарылды деп мәлімдеген. Зардап шеккендер болмаған. Осы жағдайдан кейін Молдова сыртқы істер министрлігі Ресей елшісін шұғыл шақыртып, наразылық білдірген еді.