МКК Қазақстан мен Ресей шекарасындағы кезекке түсініктеме берді

Соңғы уақытта ақпараттық кеңістікте Қазақстан мен Ресей шекарасындағы, әсіресе «Жайсаң» автокөлік өткізу пунктіндегі ұзын-сонар кезек кеңінен талқылануда. Мемлекеттік кірістер комитеті (МКК) мәлімдегендей, жүк көліктерінің шоғырлануын CarGoRuqsat электронды кезек жүйесінің жұмысына байланысты болған, деп хабарлайды Orda.kz.

МКК мәліметінше, кезектердің негізгі себебі – 13 мамырда басталып, шамамен 7 маусымда аяқталуы жоспарланған, «Жайсаң» өткізу пунктінің алдындағы Самара — Шымкент республикалық тас жолы учаскесіндегі жол жөндеу жұмыстары. Жөндеу жұмыстарына байланысты көлік қозғалысы уақытша бағдаршам мен құрылыс шлагбаумы арқылы шектелген, бұл өз кезегінде жолдың өткізу қабілетін төмендеткен.

Сонымен қатар, Ресей жақтағы «Сагарчин» өткізу пунктінде тек екі жолақ жұмыс істесе, Қазақстан жағындағы «Жайсаң» пунктінде олардың саны төртеу. Бұл өткізу мүмкіндігіндегі теңгерімсіздікке әкеліп, кезектің пайда болуына себеп болған.

«Qoldau.kz цифрлық платформасы негізінде жұмыс істейтін CarGoRuqsat электронды кезек жүйесі мемлекеттік шекараны цифрландырудың тиімді құралы болып қала береді. 2023 жылы енгізілген сәттен бастап үшінші елдермен шекарадағы өткізу пункттерінің өткізу қабілеті 61%-ға артты. ЕАЭО елдерімен шекарада жүйе арқылы 230 мыңнан астам жүк көлігі өткен. (…) Электронды кезек жүйесі көлік ағындарын тиімді реттеуге, шекарадан өту үдерістерінің ашықтығын қамтамасыз етуге, адами фактор мен сыбайлас жемқорлық тәуекелдерін азайтуға мүмкіндік береді. Сондықтан да бұл жүйе көліктердің жиналуына себеп болмайды»,  деп хабарлады МКК. 

Қалыптасқан жағдайды ескере отырып, тасымалдаушыларға келесі ұсыныстар берілді:

— CarGoRuqsat жүйесінде шекарадан өту уақытын алдын ала брондап, келу мерзімін қатаң сақтау;

— жол жағдайы мен мүмкін шектеулер туралы ақпаратты уақтылы қадағалап отыру;

— жүйені айналып өтуге арналған бот-бағдарламалар мен өзге де әдістерден бас тарту — мұндай әрекеттер бақыланып, жолы кесіледі.

2024 жылы Владимир Путин Ресейдің Экономикалық даму министрі Максим Решетниковке Алтайдағы Белуха тауына қатысты шекара мәселесін шешуді тапсырған болатын. 

Былтыр қазан айында жүк тасушылар Ақтөбе облысындағы дәл осы Жайсаң бекетінде өте ұзақ тұруға тура келетінін, күту кейде бірнеше күнге созылатынын айтып шағымданған.

Өткен жылы шекараны демаркациялау жөніндегі Қазақстан-Ресей бірлескен комиссиясының кезекті, 142-ші отырысы өтті.