Мюнхендегі жиында Зеленский 24 ақпанда Киевте саммит өткізуді ұсынды

Украина президенті Владимир Зеленский 15 ақпанда Мюнхен конференциясының негізгі отырысында сөз сөйлеп, Батыс елдері басшыларын 24 ақпанда Киевте бас қосуға шақырды, деп хабарлайды Orda.kz BBC-ге сілтеме жасап.

Украина қазірдің өзінде Ресейдің жаппай басып кіруінің үш жылдығына арналған саммит өткізуге тырысуда.

«Барлық еуропалық көшбасшылар. Біздің қауіпсіздігімізді қорғайтын барлық негізгі серіктестер. Испаниядан Финляндияға дейін. Ұлыбританиядан Польшаға дейін. Вашингтоннан Токиоға дейін.
Бұл кездесу бейбітшілікке, қауіпсіздік кепілдігіне және ұжымдық саясатымыздың болашағына қатысты келесі қадамдарымызға нақты көзқарасты көрсетуге тиіс», - деді Зеленский.

Бұған дейін Украина президенті Ресеймен бейбіт келісімге келуге дайын екенін мәлімдеген. Алайда ол үшін Украина мен оның Вашингтон бастаған одақтастары алдымен Киев пен Еуропаның осы келіссөздердегі мүдделерін сақтауды көздейтін жалпы жоспар құруы керек деді ол.

Зеленскийдің бұл ойлары бірқатар еуропалық саясаткерлердің Еуропа АҚШ пен Ресей арасындағы келіссөздер үдерісінен шеттетіледі деген қауіптерімен сәйкес келеді.

«Мен Америкасыз қауіпсіздік кепілдіктеріне сенбеймін – ол қайткенмен де әлсіз болады. Бірақ Еуропаның өз кепілдіктері күшті болмаса, Америка кепілдік бермейді. Сондай-ақ мен Украинаның НАТО-ға мүшелігін күн тәртібінен алып тастамаймын», - деді Зеленский өз сөзінде.

Украинадағы соғыс 2022 жылы 24 ақпанда басталды. Владимир Путин Украинаны «демилитаризациялау» үшін «арнайы әскери операция» деп атаған соғыс қимылдарының басталғанын жариялағаннан кейін Ресей көрші мемлекеттің аумағына басып кірді.