«Конституциялық реформамен келіспейміз» деп жаппай тәртіпсіздіктерге шақырғандар қатаң жазаланады – Мирзиёев

Өзбекстан президенті Шавкат Мирзиёев Қарақалпақстандағы жағдайға қатысты үндеу жасады.

Оның айтуынша, жеке күштер өздерінің пайдакүнемдік мақсаттары үшін «конституциялық реформамен келіспейміз» деген желеумен Өзбекстандағы жағдайды шайқалтып, тұрақсыздандыруға тырысқан.

«Демократиялық қағидаттар мен құқықтық нормалар негізінде азаматтардың еркін түрде пікірін білдіруі үшін жасалған жағдайларға қарамастан, жеке күштер агрессия мен зорлық - зомбылық жолын таңдап, өздерінің пайдакүнемдік мақсаттары үшін «конституциялық реформамен келіспейміз» деген желеумен Өзбекстандағы жағдайды шайқалтып, тұрақсыздандыруға тырысып жатыр» деді президент.

Өзбек басы деструктивті күштер әлеуметтік желіде жалған ақпарат тарату арқылы азаматтарды конституцияға қарсы әрекеттерге мақсатты түрде тартып жатқанына сендірді.

«Олардың басты мақсаты – қоғамды жікке бөлу, мемлекеттің жүргізіп жатқан сындарлы саясатына деген сенімді азайту, Өзбекстанның аумақтық тұтастығына нұқсан келтіру. Алайда Қарақалпақстанда жүзеге асырылып жатқан оң өзгерістер жедел қарқынмен жалғасатын болады» деді Шавкат Мирзиёев.

Сондай-ақ, ол сепаратизмге, жаппай тәртіпсіздіктерге, билік органдарына қарсы күш көрсетуге шақыру әрекеті қолданыстағы заңнамаға сәйкес қатаң түрде тоқтатылып, кінәлілер жазаға тартылатынын мәлімдеді.