Міржақып Дулатұлының 99 жыл бұрынғы жазбасы табылды

Қазақ халқының ағартушысы, қоғам қайраткері Міржақып Дулатұлының өз қолымен жазған қолжазбасы табылды, деп хабарлайды Orda.kz.

Бұл туралы бүгін, 10 ақпанда Мұхтар Әуезов атындағы Әдебиет және өнер институтының жетекші ғылыми қызметкерлері Насихат Мұрсалимова мен Жанат Салтақова мәлімдеді.

Қолжазбада ақынның сол кездегі Қазақстан баспасөз комитетінің баспасөз бөлімінен «Еңбекші қазақ» газетінде жарияланған жаладан өзін қорғауын, мәселені оң шешіп беруін өтінеді.

«Хат 1926 жылы 9 қыркүйекте төте жазумен, қызыл сиямен жазылған. Көлемі – 2 бет. Қолжазбаның соңғы жағында М. Дулат (Мадияр) деп қол қойылған», - деп түсіндірді институттың баспасөз қызметі.

Жазбада:

«Баспасөз бөліміне білдіргенім де осы, “Еңбекші қазақ” тағы жалаға берген жауабым да осы. Мүмкін болса мұны «Еңбекші қазаққа» бастыруыңызды өтінемін.
М.Дулат
(Мәдияр)» деп жазылған.

Міржақыптың «Еңбекші қазақ» газетінің 1926 жылғы 8 шілдедегі №145 санында жарияланған «Он алтының ойраны» атты 1916 жылғы атышулы оқиғаның ақиқаты туралы мақаласы бар. Мұнымен қоса «Жаңа мектеп» журналының 1926 жылғы №11-12-13 сандарында «Торғай уезіндегі 1916 жыл уақиғасы» атты «Торғайлық» деген бүркеншік атпен М.Дулатовтың көлемді мақаласы жарияланды. Оның мақаласының басы «Татыр соғысы» деп аталып, онда маусым жарлығына қарсы келгендерді басуға Торғай уезі басшысы Ткаченконың басшылығымен 80 шамалы атты казактың елді дүрліктіріп, ұсталғандарды ұрып-соққаны айтылады.