Минскіде билікті әжуалаған әзілкеш сотталды

Минск қаласында президентке қатысты әзіл айтқаны үшін әзілкешке сот сырттай үкім шығарды, деп хабарлайды Orda.kz.

Минск қаласының соты стендап-әзілкеш Вячеслав Комисаренконы қылмыстық істің бірнеше баптары бойынша, соның ішінде Беларусь президенті Александр Лукашенконы қорлады, жала жапты деп айыпталып 6 жылға бас бостандығынан айырылды.

БелТА-ның хабарлауынша, Комисаренко нәсілдік, ұлттық, діни немесе басқа да әлеуметтік араздықты немесе алауыздықты қоздырғаны үшін кінәлі деп танылды. Айыпталушы өз жазасын жалпы режимдегі колонияда өтейді. 

2024 жылдың тамыз айында Беларусь тергеу комитеті әзілкешке қатысты арнайы істің басталғанын хабарлады. Кейіннен айыпталушы Минск қаласы бойынша Тергеу комитетінің Орталық аудандық бөліміне шақырылды.