Минск келісімі бойынша жұмыстарға Германия канцлерінің көңілі толмайды

Мюнхен қауіпсіздік конференциясында сөйлеген Германия канцлері Ангела Меркель Донбасс бойынша Минск келісімінде ешқандай прогресс байқалмайтынын айтты.

Меркель Украинаның шығысындағы жанжалға байланысты Ресейдің іс-әрекеті Еуропа одағы мен АҚШ-тың трансатлантика одағы алдында тұрған маңызды тақырып екенін атап өтті. Ол Вашингтон мен Брюссель Донбасс мәселесін реттеуге байланысты Мәскеумен арадағы келіспеушілігіне қарамастан, әріптестікті жалғастыруы керек деп санайтындығын жеткізді.

Мюнхен конференциясы қарсаңында Украина президентіның кеңсе жетекшісі Минск келісімін қазіргі қалпында іске асыру мүмкін емес деген болатын. Дегенмен Киев келісімде көзделген принциптерді орындайтынын айтты. Донбасс бойынша үшжақты байланыс тобындағы Ресей өкілі Борис Грызлов жақында Украинаны оқ атпау туралы міндеттемесін орындамады, сонысымен жанжал аймағындағы ахуалды шиеленістіріп отыр деп айыптаған болатын.

Донбасс аймағындағы жанжал 2014 жылдан бері жалғасып келеді. Белгілісі Украина құрамындағы Донецк және Луганск облыстарының бір бөлігі Киевке бағынудан бас тартқан. Жанжал басталғалы бері 13 мың адам қаза тауып, бір жарым миллионға жуық бейбіт тұрғын үй-жайын тастап кетті. Аймақтағы жанжалды реттеумен Украина, Ресей және Еуропадағы қауіпсіздік пен ынтымақтастық ұйымының өкілдерінен тұратын үшжақты байланыс тобы айналысуда.

Жанжалды саяси реттеумен айналысатын, «Норман төрттігі» деп аталатын төртжақты топқа Германия, Ресей, Украина мен Франция мемлекеттерінің басшылары мен сыртқы істер министрлері кіреді. Украина мен Батыс елдері Ресейді Украинаның шығысындағы қарулы сепаратистерге жәрдем көрсетіп отыр деп айыптайды. Мәскеу ол айыптарды мойындамайды.