Министрлік Петропавлдағы қайталанған апат себебін түсіндірді

Петропавлдағы 2-ЖЭО-да өткен түнде қайта орын алған апатты тоқтатудың жай-жапсарын энергетиктер айтып берді.

 «26 наурызда сағат 21.30-да Петропавл 2-ЖЭО-да теріс температураның (-13 С) әсерінен ашық жылу тізбегінен импульстік құбырлар қатып қалды. Себептер – 20 наурызда болған мұржаның құлауына байланысты цехтағы қысым мен сыртқы ауа температурасының төмендеуі. Бұл 3 қазандықтың жұмысын тоқтатты. Қазіргі уақытта импульстік құбырлар жылытылды, ЖЭО-2-де 3 қазандық жұмыс істеп тұр, 4-ші қазандықты жағу басталды, жақын арада 5-ші қазандық қондырғысы пайдалануға беріледі» деп хабарлады ҚР Энергетика министрлігі  баспасөз қызметі.

Хабарда айтылғандай, қазір желідегі температура 45С, тәуліктің соңына дейін температуралық режимді қалпына келтіру жоспарлануда.

Петропавл ЖЭО-дағы екінші апат туралы бүгін таңертең белгілі болды. Жергілікті тұрғындар пәтерлердегі батареялар қайтадан әрең жылынып, ыстық су жоғалып кеткенін хабарлады.