Министрлік пен сурдлимпиада чемпионы арасындағы сот: Оқиғаның мән-жайы

Мәдениет және спорт министрлігі Сурдлимпиада чемпионы Еркебұлан Қанафиннің шағымы бойынша сотта жеңілді.

– 30 қарашада Астана қаласының Мамандандырылған ауданаралық әкімшілік соты Қазақстан Республикасы Мәдениет және спорт министрлігі мен 2022 жылғы Сурдлимпиада ойындарының чемпионы Еркебұлан Қанафин арасында іс жүргізу бойынша шешім шығарды, – деп хабарлады Қазақстан Республикасы Ұлттық сурдлимпиада комитеті.

Сот ҚР Әкімшілік рәсімдік процестік кодексінің 151-152, 154-155 баптарын басшылыққа ала отырып, Судрлимпиада ойындарының алтын медалін алған Қанафинге ақшалай сыйақы төлеуден бас тарту туралы шешімді заңсыз деп таныған.

– Қазақстан Республикасы Мәдениет және спорт министрлігі мемлекеттік мекемесінің Қанафин Еркебұлан Қайратұлына ақшалай сыйақы төлеуден бас тарту жөніндегі әрекеті заңсыз деп танылсын. Қазақстан Республикасы Мәдениет және спорт министрлігі мемлекеттік мекемесі Еркебұлан Қанафинге Қазақстан Республикасы Үкіметінің 2020 жылғы 27 наурыздағы қаулысымен белгіленген мөлшерде ақшалай сыйақы төлесін, – деп жазылған мамандандырылған ауданаралық әкімшілік соттың шешімінде.

Мәдениет және спорт министрлігі Еркебұлан Қанафин есту қабілеті бұзылған спортшылар арасындағы ресми жарыстарға қатыспайтынын, ұлттық құраманың мүшесі емес екенін және мүмкіндігі шектеулі жандарға арналған спорт ұйымдарына тіркелмегенін мәлімдеді.