Министрлік қаржы пирамидасын жарнамалаған жұлдыздарды жауапқа тартуға ниетті

Ішкі істер министрлігі қаржы пирамидаларын жарнамалаған жұлдыздарды жауапқа тартуға ұсыныс білдірді. Ұсыныс өз кезегінде прокуратураға жіберілді.

КТК телеарнасының хабарлауынша, аз уақытта үлкен пайдаға кенелгісі келетін азаматтар саны әлдеқайда артқан. Былтыр 30 мың адам зардап шегіп, 54 млрд теңгесінен айрылған.

Айта кетсек, қаржы пирамидасын жиі отандық әншілер, блогерлер мен актерлер, спортшылар жарнамалайды. Арызданушылардың көбі жұлдыздарға сенім артады. Бірақ қазіргі таңда қаржы пирамидасын жарнамалағандар жауапқа тартылмайды.

Қазіргі таңда 126 алаяқ жауапқа тартылған. 38-і сотталса, қалғанына қатысты тергеу амалдары жүріп жатыр. Сотталғандардың ішінде «Гарант 24 Ломбард» ұйымдастырушылары бар, олардан 17 адам зардап шеккен.

«L-Капитал» қаржы пирамидасының екі көшбасшысы сот шешімін күтіп отыр. Одан 300 адам зардап шегіп, 260 млн теңгесінен айрылған.

Ал кезекті «Evolution corp.» пирамидасына адамдар 3 млрд теңге жинаған. Ұйымның барлық мүлкі тәркіленген.

«Қабылданған шараларға сәйкес жылжитын және жылжымайтын мүлікке тыйым салынды, оның ішінде 60 көлік, 4 пәтер, 5 жер телімі, 31 жеке үй бар. Іс сотта қаралып жатыр. Біздің ойымызша, қаржы пирамидасын жарнамалау, жарнамаға қатысты қылмыс құрамын тексеру және сәйкес қылмыстық жауапқа тарту тиімді шара болмақ. Сәйкес ұсынысты Бас прокуратураға жолдадық» деді ҚР ІІМ тергеу департаментінің басшысы Санжар Әділов.