Министр жаңа қару-жарақ қоймаларын тезірек салуды тапсырды

ҚР Қорғаныс министрі Нұрлан Ермекбаев оқ-дәрілерді сақтауға арналған екі базаның құрылысын тездетуді тапсырды.

Бұл туралы Orda.kz хабарлады.

Базалар құрылысы 2019 жылы ҚР Қарулы Күштерінде қару-жарақ пен оқ-дәрілерді сақтау қоймаларын жетілдірудің кешенді жоспарында қарастырылған.

Хабарланғандай, нысандар оқ-дәрілерді қауіпсіз сақтау үшін барлық жағдайды ескере отырып ұйымдастырылған. Нысандар техникалық күзет құралдарымен, бейнебақылау жүйесімен және автоматты өрт сөндіру жүйесімен жабдықталған.

Құрылыс жоспарында 2020 жылы Қорғаныс министрлігінің бастамасы бойынша заңнамаға енгізілген арсеналдар мен базалардың алыс орналасуы, шектелген аймақтар мен аумақтардың шекараларының сақталуы ескерілген.

Айта кетсек, әскери сарапшы Амангелді Құрмет Orda.kz сайтына берген сұхбатында Қорғаныс министрі Нұрлан Ермекбаев оқ-дәрілерді сақтаудағы барлық заң бұзушылықтарды жойғаннан кейін ғана отставкаға кетуі керектігін айтты.

Құрмет мырзаның айтуынша, 2019 және 2021 жылдардағы әскери бөлімдердегі жарылыстардың басты себебі - оқ-дәрі сақтайтын қоймалар әбден ескірген және қазіргі стандарттарға сай емес. Сарапшы кеңес уақытында қоймалар әскери бөлімдердің жанына салынғанын, өйткені соғыс болған жағдайда сарбаздардың оқ-дәрілерге тез қол жеткізуі қажет болғанын атап өтті. Енді жаңа қоймалар салу керек.