Министр Балаева қазақстандық спортшыларды қорғап шықты

ҚР Ақпарат министрі Аида Балаева жанкүйерлерден олимпиадашыларымызды бағалауды және олардың бұған дейінгі Олимпиададағы жетістіктеріне ризашылық білдіруді сұрады.

Бұл туралы Orda.kz хабарлады.

– Өкінішке қарай, бүгінде Токио олимпиадасындағы кейбір спортшыларымыздың сәтсіздігіне көпшілік жағымсыз пікірлермен тым әділетсіз сын айтып жатыр. Оның ішінде бұған дейінгі жарыстарда еліміздің атын төрткүл дүниеге танытып жүрген танымал атлеттеріміз де аталуда. Мысалы, 2016 жылы Рио Олимпиадасында Василий Левиттің рингтегі өнеріне бүкіл еліміз тамсанды, оған көрсетілген әділетсіздікке бірге жандары ауырды. Осы жолы Василий жеңілді, бірақ оның осы бес жыл ішінде еліміз үшін дайындалып, кезекті олимпиадалық циклден өтіп, рингке қайта шығуының өзі құрметтеуге тұрарлық шешім деп санаймын, - деп жазды министр.

Оның айтуынша, жанкүйерлер осы ойындарда жеңіліс тапқаны үшін оған қарсылық білдірмеуі керек, сонымен қатар Лондондағы Олимпиада чемпионы Токиоға жолдама алмаған Ольга Рыпакованы сынға алмау керек.

– Ольга бүкіл саналы ғұмырын отандық спорт жолына арнап, еліміздің атын талай мәрте дүбірлі додаларда асқақтатқан бірегей жеңіл атлет. Ол 36 жасында өзінің төртінші Олимпиадасына қатысып, еліміздің намысын кезекті рет қорғауға шешім қабылдады. Олар үлкен спорттағы мансабын аяқтағанымен, алдағы уақытта өздерінің ізін басар шәкірт тәрбиелеуде үлкен еңбек етеді деп сенемін, - деді Балаева.

Ол Левит пен Рыпакованың «жаңа буын чемпиондарын тәрбиелеуге» көп уақыттары болатынын айтты.

– Сондықтан қандай жағдайда да спортшыларымыздың жетістіктері мен жеңістерін біз ешқашан ұмытпауымыз керек. Қиын сәттерде қолдау көрсету арқылы ғана біз оларға сенім ұялатып, келер күндердің жеңістерінен үміт ете аламыз, - деп қорытындылады министр.

Ол біздің спортшылардың барлығы да нағыз Чемпиондар екенін айтты.