Ең жас министр қазақ тілінде сөйлеуге уәде берді

Ұлттық экономика министрі Әсет Ерғалиев Орталық коммуникациялар қызметінде өткен брифингте қазақ тілін үйреніп жатқанын айтты.

Бұл туралы Orda.kz хабарлайды.

Министр қазақ тілін үйрену үшін күніне 1,5 сағат уақыт жұмсайды екен.

– Қазақ тілін үйренуге күніне 1,5 сағат уақыт жұмсаймын. Жақын арада таза қазақша сөйлеуге уәде беремін. Ұлттық экономика министрлігінде маған қазақ тілін үйрететін қызметкер бар.

Бізде кез келген министрлікте, мемлекеттік органда құжат аударумен айналысатын аудармашылар бар. Олардың арасында қазақ тілін жақсы білетін балалар да бар. Біз бірге отырып дайындаламыз. Олардың бірнеше жылдар бойы жинақталған өзіндік әдістемелік базасы бар. Осы әдістемелік базаны пайдалана отырып, мен қазақ тілін үйренемін, - деді ең жас министр.

Еске сала кетейік, 18 қаңтарда Мемлекет басшысының жарлығымен Ұлттық экономика министрі болып Әсет Ерғалиев тағайындалды. Әсет Ерғалиев - Үкімет мүшелерінің арасындағы ең жасы. Ол 34 жасында министр болды.

3 ақпанда ведомство басшысы ретінде Мәжіліс отырысына алғаш рет қатысқан Ұлттық экономика министрі Әсет Ерғалиев қазақша сұраққа орысша жауап бергені үшін депутат Берік Дүйсенбиновтен сөз естіген болатын.