Министр Қазақстаннан 30 жылда қанша ақша шығарылғанын айтты

Ұлттық экономика министрі Әлібек Қуантыров 30 жыл ішінде Қазақстаннан сыртқа қанша қаржы шығарылғанын айтты.

ОКҚ брифингінде Ұлттық экономика министрінен президенттің тапсырмасы бойынша Қазақстанға қайтаруды жоспарлап отырған заңсыз шығарылған капиталдың сомасын атау сұралды.

- Негізінен, бірнеше ондаған миллиард доллар бар. Оларды қайтару туралы да түрлі механизмдер қарастырып жатырмыз. Жаңа тәсілдермен қарастыратын болсақ салықтық және салықтық емес ынталандыру шаралары бар. Салық бойынша белсенді жұмыс істеп жатырмыз, ал салықтық емес бойынша да жақсылап қарауымыз керек, - деп жауап берді министр.

Министрдің айтуынша, капиталды қайтаруды ынталандыру бойынша басқа шаралар бар. Ол бұл шаралардың Салық кодексіне түзетулер жобасына енгізілгенін атап өтті.

- Егер біз, тікелей шетелдік инвестициялар тартсақ, біздің көлеміміз 30 жыл ішінде 400 миллиард доллардан асады. Бұған дейін он миллиардтан аса қаражат шығарылған шығар, бірақ нақты соманы айту қиын. Шамамен 100 миллиард доллар болуы да мүмкін, - деді ол.