Министр Қазақстанда көмір қорының жеткілікті екенін айтты

Үкімет отырысы өтіп, 2021-2022 жылдарға арналған жылу беру маусымына дайындық мәселесі қаралды. Онда Энергетика, индустрия және инфрақұрылымдық даму министрі, сондай-ақ Атырау, Қарағанды ​​және Павлодар облыстарының әкімдері баяндама жасады.

Энергетика министрі Мағзұм Мырзағалиев еліміздегі электр станцияларында 4 энергоблокта, 18 қазандықта, 19 турбинада жөндеу жұмыстары аяқталғанын айтты. Оның мәліметінше, қазіргі күні 20 468 шақырым электр беру желісінің 13 мың шақырымнан астам жоспары орындалған.

Бүгінгі таңда 20 468 шақырым электр беру желісінің жылдық жоспарының 13 773 шақырымы, 462 бірлік жоғары вольтты қосалқы стансаның 316 қосалқы стансасы жөнделді, бұл желі бойынша 67 пайызды және 68 пайызды құрайды, - деді министр.

Сонымен қатар, Атырау, Қарағанды, Павлодар және Солтүстік Қазақстан облыстарындағы электр станцияларының негізгі жабдықтарын жөндеу жұмыстарының белгіленген мерзімдерінің сақталмауы да байқалады. Индустрия және инфрақұрылымдық даму министрі шаруашылық секторын көмірмен қамтамасыз ету бойынша апта сайын мониторинг жүргізіліп жатқанын айтты. Ағымдағы жылы көмір өндіруші кәсіпорындар 68 миллион тоннаға жуық көмір өндірді.

Бейбіт Атамқұловтың айтуынша, «Богатырь Көмір», «Шұбаркөл Көмір» және «Қаражыра» кен орындарында өндіріс көлемінің артуы байқалады.

Жалпы, барлық өңірлерде жеткілікті көлемде көмір қоры жинақталған, толқу да, тапшылық та болмайды. Теміржол көлігі паркі көмірді толық көлемде тасымалдауды қамтамасыз етеді, - деді Атамқұлов.

Облыс әкімдері өңірлерде көмірдің құны тоннасына 5-19 мың теңге аралығында екенін жеткізді. Баға, ең алдымен, көмірдің сортына, өндіріс шығындарына және жеткізу қашықтығына байланысты қойылатынын да айтты.