Министр ауыл кітапханаларына кітап сыйлауға шақырды

Мәдениет және ақпарат министрі Аида Балаева әріптестерін «Ауыл кітапханаларына 100 кітап» акциясына қатысуға шақырды, деп хабарлайды Orda.kz.       

Бұл туралы ол Facebook желісінде жазба жариялады.

«Өздеріңіз білесіздер, президент Ұлттық Құрылтай отырысында: «Шын мәнінде, кітап оқитын халық қана нағыз зиялы бола алады. Біз өскелең ұрпақтың кітап оқуға деген қызығушылығын оятуымыз керек» деп кітап мәселесіне ерекше тоқталған болатын. Осыған орай біз «Ауыл кітапханаларына 100 кітап» акциясын бастадық» деп жазды Аида Балаева.

Ол Абай Құнанбайұлының ауылына Қарауылға, Қаныша Сәтбаев туылған Баянауыл ауылына әлем және қазақ әдебиетінің таңдаулы туындыларын, танымдық-ақпараттық әдебиеттерді өзі тарту еткенін атап өтті.

Ол бұл акцияны қолдаған Ішкі істер министрі Ержан Сапарбекұлы, Ауыл шаруашылығы министрі Айдарбек Сейпелұлы, Еңбек және халықты әлеуметтік қорғау министрі Светлана Қабыкенқызы, бұрынғы әріптесі Цифрлық даму, инновациялар және аэроғарыш өнеркәсібі экс-министрі Бағдат Батырбекұлы акцияға қатысып, еліміздің бірқатар облыстарындағы ауылдық кітапханаларға 100 кітап сыйға тартқанын жазды.

Оның айтуынша, басқа әріптестер де алдағы уақытта акцияны қолдауға ниет білдірді.

«Осы бастамамен біз шалғайдағы ауыл кітапханаларына соңғы үлгідегі туындыларды жеткізіп, жас ұрпақтың кітап оқуға деген қызығушылығын арттыруға тырысамыз, акцияға басқа да мекемелер мен ұйымдар, сондай-ақ барлық мүдделі азаматтар қатысады деп үміттенеміз» деп қорытындылады министр.