Министр Атамқұлов ауыз су мәселесі туралы есеп берді

Үкімет отырысында ауылдық елді мекендерде сумен жабдықтау қызметтерін қолжетімді ету мәселесі қаралып жатыр. Индустрия және инфрақұрылымдық даму министрі Бейбіт Атамқұлов 2025 жылға дейін халықты толығымен сапалы ауыз сумен қамтамасыз ету қажеттігін айтты. Бұл - президент тапсырмасы.

– 2020 жылдың қорытындысы бойынша елдегі сумен жабдықтау қызметтеріне қолжетімділік деңгейі 94,1%-ды құраған. Оның ішінде ауылдарда - 90,1%, қалаларда - 90,5%. Ағымдағы жылдың соңына дейін көрсеткіш ауылдарда 91,8%-ға, қалаларда 98%-ға жетуі тиіс, - дейді министр Атамқұлов.

Министрдің айтуынша, ауыз сумен қамту деңгейі Атырау, Алматы, Қызылорда облыстарында жоғары. Артта қалып жатқан өңірлер: Қостанай, ШҚО, СҚО, Жамбыл облыстары. Сумен қамтамасыз ету деңгейін арттыру үшін оларға басымдықпен қаражат бөлінбек.

Атамқұловтың есебін тыңдаған премьер-министр Асқар Мамин бақылау мен үйлестіру жұмыстарын Роман Склярға жүктеп, бірқатар тапсырма берді.