Министр Айдарбек Сапаров статистикада өтірік барын мойындады және оны биыл тоқтатуға уәде берді

Ауыл шаруашылығы министрі Айдарбек Сапаров ауыл шаруашылығы саласында жалған статистика барын мойындады, деп хабарлайды Orda.kz порталы.

«Ауыл шаруашылығы саласында өтірік есеп беру мәселесі әлі де өзекті. Ауыл ауданға, аудан облысқа, облыс республикаға өтірік есеп беретін жайттар кездеседі. Оған тосқауыл бар ма? Өтірік есеп беру үрдісі қашан тоқтайды» деп сұрады журналистердің бірі ОКҚ алаңында Айдарбек Сапаровтан.

Бұл сұраққа министр жауап ретінде «сонымен, біз биыл айналыса бастадық» деді.

«Биылдан бастап тоқтайды. Жарты жыл, жыл аяғына дейін бірінші біз өсімдік шаруашылығын, сосын мал шаруашылығы екеуін де орнына келтіріп, есепті түзеп, ары қарай бұл көрсеткішті әкімге кіргізгенде көрсеткіш азаяды. Біз оны қазір азайтамыз. Мысалы, картопты, бидайды атап өттік. Неше түрлі қосымша көрсеткіштер болған. Соны азайту үшін тыйым қоямыз. Бәленбай жылдан бері жалғасып келе жатқан жұмыс. Биылдан бастап тоқтатсақ, жауапкершілікке тартамыз. Бұлай ары қарай жұмыс жүргізуге болмайды», – деді ол.