Қызылорда облысы Жалағаш ауданында Жалағаш аудандық білім бөлімінің жергілікті мектеп басшыларына жазған хаты әлеуметтік желіде тарады. Онда 12 жастан асқан оқушылардың санын нақтылау қажеттігі айтылған. Тұрғындар хатта балаларға міндетті екпе салу үшін тізім сұралған деп түсінді.
Бұл туралы Orda.kz хабарлады.
Хатты алған ата-аналар біраз шошып қалды. Осыдан ата-аналардың балаларға екпе салдыруға дайын еместігі белгілі болды.
– Біздің елімізде қолданыстағы заңнамаға сәйкес 18 жасқа дейінгі балаларға кез келген вакциналау ата-анасының келісімінсіз жүргізілмейді, – деді облыстық білім басқармасының басшысы Ақзира Қасымова.
Аудандық білім бөлімінің басшысы мерзімінен бұрын бастама көтергені үшін жазаланды.
– Облыстық білім басқармасы ата-аналарды алаңдатып, қоғамда екіұшты пікірге жол берген Жалағаш аудандық білім бөлімі басшысының қызметтік жауапкершілігін қарастырды. Оған тәртіптік жаза ретінде сөгіс жарияланды, – деп түсіндірді Қасымова.
Баспасөзге Қызылорда облысы бойынша ҚҚДБ бастығының орынбасары Әлия Әбдіқайымова да жауап берді.
– Елде балалар мен жасөспірімдерді коронавирус инфекциясына қарсы вакциналау туралы шешім әлі қабылданған жоқ. Балалар мен жүкті әйелдерді вакциналауға рұқсат етілген американдық Pfizer вакцинасы әлі елге әкелінбеген, – деді ол.
