«Миллиардтаған қаржы бөлінді»: Оралдағы жылу магистральдары қайта жасалады

Қазақстан Үкіметі келесі жылыту маусымының үздіксіз өтуін қамтамасыз ету үшін Батыс Қазақстан облысына шамамен 4,9 миллиард теңге бөлді. Тиісті қаулыға Премьер-Министр Олжас Бектенов қол қойды.

Бұл туралы үкімет хабарлады.

Қаржы Орал қаласындағы екі жылу магистралін қайта құруға бағытталып отыр. Бұл нысандар «қызыл аймақ» қатерлері тізіміне енген 19 жылу көздері қатарына кіреді. Олардың жаңғыртуын Президент Қасым-Жомарт Тоқаев тәртіппен жүргізуді тапсырды.

Еске сала кетейік, осы жылдың ақпан айында өңірге жұмыс сапары барысында Премьер-Министр Олжас Бектенов Батыс Қазақстан облысы әкімдігіне қайта құруды қажет ететін жылумен қамтамасыз ету нысандары құжаттамасын дайындауды тапсырды. Нәтижесінде, ТМ-5 және ТМ-2 жылу магистральдары жобалары дайындалып отыр.