Михаил Ломтадзе доллар мен банкротқа қатысты қауесеттерге жауап берді

13 наурызда ұсталған Қайрат Сатыбалдының ісі және Украина мен Ресей арасындағы соғыс салдарынан Kaspi.kz айналасында туындаған қауесеттерге байланысты банк басшысы Михаил Ломтадзе бейнеүндеу жасады.

Өзінің Youtube-тегі ресми арнасында банкке қатысты тараған ақпараттарды Михаил Ломтадзе «миға сыймайтын қауесет» деп атады.

«Бірінші, Kaspi-дің банкроттығы туралы хабарламалар. Бұл нағыз далбаса. Мен Kaspi компаниясын 2007 жылдан бастап, 15 жылға жуық басқарып келемін. Біздің жетістіктеріміз бен жұмысымыз үшін жеке жауаптымын. Біз еліміз үшін көп нәрсе жасадық, клиенттеріміз бізді жақсы көреді, мұндайда көптеген арам пиғылдылар мен жаман адамдар қызғанышпен қарап,  ақша төлеп, өтірік қауесет таратып, арандатушылық ұйымдастырып, бәрін бүлдіруге тырысатыны анық» делінген үндеуде.

Ломтадзе Қазақстандағы қолма-қол доллар тапшылығы туралы да айтып кетті.

«Бірден айтайын, бұл Ресейге қарсы санкцияларға тікелей байланысты уақытша құбылыс, соның салдарынан әдеттегі бағыттар бойынша қолма-қол ақшаны жеткізу қиынға соғуда. Мысалы, Украина мен Ресейді айналып өту салдарынан тұрақты рейстердің уақыты ұзарып кеткенін немесе мүлде тоқтап жатқанын бәріміз көріп отырмыз. Қолма-қол ақшаны жеткізу бойынша да осындай мәселе бар. Ұлттық банк қазір АҚШ-тан тікелей жеткізуді ұйымдастырумен айналысып жатыр және жақын арада қолма-қол ақша әкелуге уәде берді. Бұл тек қолма-қол валютаға қатысты уақытша тапшылық. Көріп отырғаныңыздай, доллармен қолма-қол ақшасыз операцияларды еркін жасауға болады. Бұл жағдайдың теңгеге мүлдем қатысы жоқ» деп баса айтты ол.

Сонымен қатар, Ломтадзе Қайрат Сатыбалдының кешегі тұтқындалуына қатысты да пікір білдірді.

«Бізге клиенттер тарапынан мұндай сұрақтар болған жоқ. Бірақ біздің жауларымыз осы фактіні пайдаланып, біз туралы тағы да жағымсыз пікір айтуға тырысатынына сенімдімін. Сондықтан мен бұл жөнінде алдын ала пікір білдіргім келеді. Қайрат Сатыбалдының Kaspi-мен 4 жылдан бері мүлдем қарым-қатынасы жоқ. Ол 2015-2018 жылдар аралығында қысқа уақыт аралығында Kaspi акционерлерінің бірі болды» деді Kaspi басшысы.