Миграциялық рейдтер жаппай наразылық тудырды: Трамп Лос-Анджелеске Ұлттық гвардияны кіргізді

АҚШ президенті Дональд Трамп Лос-Анджелеске екі мың Ұлттық гвардия сарбазын енгізді, деп хабарлайды Orda.kz Reuters агенттігіне сілтеме жасап.

Жұма күнінен бері наразылық білдірушілер мен федералды агенттер арасында қақтығыстар жалғасып жатыр. Мигранттарды ұстауға бағытталған рейдтер ашу-ыза тудырып, ашынған демонстранттар Лос-Анджелестің орталығындағы федералды үкімет ғимаратын қоршап алды. Ұсталғандардың бәрі осында  жеткізілді.

Жаппай тәртіпсіздік кезінде түсірілген кадрларда полиция қызметкерлерінің бронежилет киіп, көзден жас ағызатын газ және резеңке таяқшалармен наразыларды таратып жатқаны көрінеді.

«Бір видеода наразы азамат полицияның жол талғамайтын көлігін тоқтатпақ болған сәтте, көлік тоқтамай, сол адамды қағып өтті» деп хабарлайды БАҚ

Иммигранттарды ұстауға бағытталған рейдтерге Лос-Анджелес мэрі Карен Басс пен қалалық полиция басшысы Джим Макдоннелл өз наразылықтарын білдірді. Ал АҚШ-тың Көші-қон және кеден қызметі (ICE) директорының міндетін атқарушы Тодд Лайонс Карен Басты бүлікке қолдау көрсетті деп айыптады.

Ақ үйдің хабарлауынша, Дональд Трамп тәртіпсіздікке жол берілмеуі үшін Лос-Анджелеске екі мың Ұлттық гвардия қызметкерін кіргізу туралы президенттік меморандумға қол қойды.

«Президент Трамп заңсыздықтың кең таралуына жол бермеу үшін екі мың гвардия сарбазын жіберуді көздейтін меморандумға қол қойды», – деді Ақ үйдің баспасөз хатшысы Кэролин Левитт.

Калифорния штатының губернаторы әскер енгізу жағдайды ушықтырады деп есептейді.

Айта кетейік, Дональд Трамптың көші-қонға қатысты саясаты бастапқы кезден-ақ өте қатаң болды. Жуырда ол 12 елдің азаматтарына АҚШ-қа кіруге тыйым салды.

Биылғы жылдың басында АҚШ-та миграциялық заңнаманы бұзды деген күдікпен қазақстандықтар да ұсталған болатын.