МГИМО қабырғасында көз жұмған бойжеткен ісі сотқа жетті

Мәскеудегі Никулинский аудандық сотына Қазақстаннан келген МГИМО студенті Томирис Байсафаны өлтіру туралы іс түсті.

Муртузали Меджидов Томирис Байсафаны өлтірді деп айыпталуда. Бұл Дағыстаннан шыққан жоғары лауазымды шенеуніктің ұлы. Күдікті Томиристің өлімінен екі жыл өткен соң, 2020 жылы шілдеде қамауға алынды.

Іс бойынша алғашқы сот отырысы 23 наурызда өтеді.

21 жастағы Томирис Байсафа 2018 жылдың 13 сәуірінде Мәскеу мемлекеттік халықаралық қатынастар институтының терезесінен құлап кетті. Ол ауыр жағдайда Склифосовский атындағы ғылыми-зерттеу институты ауруханасына жатқызылды. Қыз 3 мамырда көз жұмды. Тергеушілер Муртузали Меджидовты жауап алуға шақырды. Қайғылы оқиға кезінде ол Томириспен бірге аудиторияда болғандығы анықталды. Сондай-ақ, анасының айтуынша, жастар екі жыл бойы қыз бен жігіт болып жүрген.