Метро қызметкерлері басшыларына наразы

Orda.kz редакциясына Алматы метрополитені «қызметкерлері» өз ұйымында болып жатқан оғаш оқиғалар туралы жазған ашық хаттың сканерленген көшірмесі келіп түсті.

Хатта Экономикалық тергеу департаментінің (ЭТД) қызметкері Рахат Рысжанов жаңа «Сары Арқа» және «Момышұлы» метро стансаларының құрылысын тексеру қызметін пайдаланып, метро басшылығын өзіне тәуелді етіп алғаны айтылған. Ал метродағылар Рысжановтың жақындары мен таныстарын маңызды қызметтерге орналастыра бастаған. Олардың көпшілігі біліктілік талаптарына сай емес және бұл салада тәжірибесі де жоқ.

Бірақ, соған қарамастан, олар өз тәртіптерін орнатып, ешкімге  бағынбайтындықтарын ашық көрсетіп, жанжал тудырып, ескі кадрларды тықсырып жатыр. Соның салдарынан  хатта айтылғандай метродағы билік ауыса бастаған.

Осындай жағдайда қалған метро қызметкерлері құқық қорғау органдарының басшылары мен президент әкімшілігіне тексеру жүргізу туралы өтінішпен жүгінуге мәжбүр болған.

Orda.kz тілшісі «Метрополитен»  мемлекеттік кәсіпорнының баспасөз қызметіне түсініктеме алу үшін сұрау салған еді, олар бұл хат тамыз айында жазылғанын және бүгінгі күні мәселенің шешілгені хабарлады.

«Метро қызметкерлерінің ұжымдық үндеуіне байланысты Алматы қалалық ұтқырлық басқармасының, тексеру комиссиясы және қала әкімі аппаратының құзырлы қызметкерлерінен комиссия құрылды. Ұсыныс қалалық ұтқырлық басқармасының аппараттық отырысында департамент пен метрополитеннің барлық жауапты қызметкерлерінің қатысуымен қаралып, талқыланды», - деді баспасөз қызметінің өкілі.

Тексеру нәтижелері бойынша ҚР Еңбек кодексінің 60-бабының 1-бөлігі бойынша біліктілік талаптарына сәйкес келмейтін қызметкерлермен еңбек қатынастары тоқтатылған.

Олардың жауабына сенер болсақ: ұсыныста көрсетілген ескертулер мен кемшіліктер ескерілген. Кейбір қызметкерлерді қабылдауға ықпал еткен себептер анықталып, департаменттің құрылымдық бөлімшелері мен метрополитен басшылығының назарына жеткізілген. Бүгінгі таңда барлық кадрлық мәселелер заңға сәйкес реттелген.