«Мені өлтіреді»: Украина үшін соғыспақ болған 19 жастағы қазақстандық Ресей түрмесінде азапталуда

Ресейде 19 жастағы қазақстандық Туран Устюговқа қатысты сот 20 наурызда басталады. Оны өткен күзде Қырымда тұтқындаған. Ресей арнайы қызметтері Устюговтың Украинаға өтіп, Ресейге қарсы соғысуды жоспарлағанын мәлімдеді, деп жазады Orda.kz.

Жас жігіттің анасы ұлын құтқару үшін Астана мен Мәскеуге хат жазып, адвокатқа ақша жинап, тергеу изоляторына азық-түлік жіберіп отыр.

Туран Устюговқа қатысты іс Ростов-на-Дону қаласындағы Оңтүстік әскери сотында қаралуда. 13 наурызға белгіленген алғашқы отырыс кейінге қалдырылып, тыңдаулар 20 наурызға ауыстырылды.

Азаттық радиосының хабарлауынша, Устюгов «террористік ұйым қызметіне қатысу» және «террористік әрекетке дайындалу» баптары бойынша айыпталуда. Бұл баптар бойынша 20 жылға дейін бас бостандығынан айыру жазасы қарастырылған.

Туран Устюговтың анасы Эльмира Жанабаева ұлының Украинаға баруына жол бермеуге тырысқанын айтады. Ол ұлын психологиялық көмекке жүгінуге көндіріп, Ресейден мобилизациядан қашқан азаматтармен сөйлестірген. Бірақ Туран Украинаға барып, украиндықтарға көмектесуді қалаған.

2023 жылдың қазанында ол жоғалып кетіп, бір аптадан кейін анасымен байланысқа шыққан. «Ана, мені азаптап жатыр!»  деп айғайлағанын еске алады анасы. Тергеу изоляторына ауыстырылғаннан кейін оны аяусыз соққыға жыққаны белгілі болды.

Қазіргі таңда Устюговтың тағдыры белгісіз, ал анасы оны құтқару үшін күресіп жатыр.