«Мен ұры емеспін, мен кісі өлтірмедім»: Сотта Тұрлыхановтың ұлы не деді?

Депутат Дәулет Тұрлыхановтың ұлы Нұрасыл Болаттың бас бостандығын шектеуді бас бостандығынан айыру жазасына ауыстыру мәселесі бүгін Алматы қаласы Медеу ауданының №2 аудандық сотында қайта қаралды, деп хабарлайды Оrda.kz.

Сот процесі бастала салысымен Нұрасыл Болаттың қорғаушысы Назкен Құсайынова істің бұқаралық ақпарат құралдарының қатысуынсыз өтуін сұрады. Бірақ Анна Чернова бұл істі жабық түрде қарауға еш негіз жоқ екенін жеткізді. Судья кеңесу бөлмесінен шыққаннан кейін істің журналистердің қатысуымен өтетінін хабарлады.

Депутаттың ұлына екі ереже бұзу бойынша айып тағылуда. Алғашқысы 2024 жылдың 11 қазанында тіркелді. Ол күні Нұрасыл Болат «Elegant Hall» түнгі клубында болды, бұл көңіл көтеру орындарына баруға тыйым салу ережесін бұзу болып есептелді. Екінші ереже бұзу фактісі 12 қазанда орын алды, ол кезде оның «Queen» караоке-барда болғаны анықталды.

Нұрасыл Болаттың қорғаушысы Назкен Құсайынованың айтуынша, Нұрасыл Болат пробациялық қызмет тарапынан заң бұзушылықтар болғанын айтып отыр. Сонымен қатар, электронды бақылау құралының 2-3 сағат сайын өшіп, қуаттауды талап етуі оған үлкен қолайсыздық тудырған.

«Небәрі 21 жасар жігітті бас бостандығынан айырғаннан не пайда? Ол 5 ай бойы пробациялық бақылау қызметінің қысымында болып, күйзеліске ұшырады. Оның үстіне, соңғы екі түсініктемені бір күнде жаздырған»,— деді Құсайынова.

Сондай-ақ, депутаттың ұлы сотта судья оған сөз бермесе де: «Мен ұры емеспін, мен кісі өлтірген жоқпын, неге мені бас бостандығымнан айыру керек?» — деп айтып қалды.

Сотта прокурор Нұрасыл Болаттың 5 ай бойы пробациялық қызметтің қысымында болғанын жоққа шығарды.

«Нұрасыл Болаттың қалған 1,5 жыл мерзімінде бас бостандығынан айыруды сұраймыз. Сонымен қатар, ол түсініктемелерді пробациялық қызметтің қысымымен жазды және өзінің не жазып жатқанын түсінбеді дегенге сену қиын. Өйткені кез келген уақытта ол өз қорғаушысынан барлық ақпаратты сұрап алуға мүмкіндігі бар»,— деді прокурор.

Анна Чернова прокурордың айтқанымен толықтай қосылатынын жеткізді.

«Нұрасыл Болатқа әрдайым пробациялық бақылау қызметі тарапынан ескертулер болды. Түсіндіру жұмыстары толық жүргізілді және түнде белгіленген уақыттан кейін көңіл көтеретін түнгі клубтарға баруға тыйым салынатыны жайлы да айтылды. Оны өзі де білді. Сондықтан мен прокурордың айтқанымен келісемін», — деді Чернова.

Сотталушы мен оның адвокаты Назкен Құсайынова жазаны өзгертпеуді сұрап, тек бір ғана ереже бұзылғанын алға тартты.

«Құрметті сот, мен кінәмді мойындаймын, ережені бір рет бұзғаным рас»,— деді соңғы сөзінде Нұрасыл Болат.

 Сот шешімі ертең 22 қазанда жарияланады.