Мен халыққа жақсы атану үшін «тариф өспейді» деп айтқым келмейді – премьер-министр

Астанада премьер-министр Олжас Бектенов пен оның төрт орынбасары журналистер алдына шықты, деп хабарлайды Orda.kz.

Кездесу барысында БАҚ өкілдері қойған негізгі сауалдардың бірі — коммуналдық қызмет тарифтері жайлы болды.

Бұған дейін үкімет инфляцияны ескеріп, тарифтердің өсу қарқынын уақытша бәсеңдететінін мәлімдеген еді. Алайда Бектенов бұл тарифтердің өсуі мүлде тоқтайды дегенді білдірмейтінін ашық айтты.

«Тағы бір мәрте қайталап айтамын: тариф өсімінің баяулауы — өсу тоқтайды деген сөз емес. Мұны барлығы дұрыс түсінуі қажет. Мен халыққа жақсы болу үшін «тарифтер өспейді» деп айтқым келмейді. Жоқ, өседі. Осы арқылы тұрғын үй-коммуналдық шаруашылық саласына инвестиция тартамыз», — деді премьер-министр.

Оның айтуынша, «Тариф есебінен инвестиция» бағдарламасы 2023 жылдан бері іске асып келеді. Бүгінге дейін бұл бастама аясында тұрғын үй-коммуналдық шаруашылық саласына 605 миллиард теңге тартылған.