Мемлекеттік қызмет істері агенттігі Серғазиеваға қатысты пікір білдірді

Айнұр Серғазиеваның Мемлекеттік қызмет істері агенттігі төрағасының орынбасары қызметін атқаратыны белгілі болды.

Ол E-qyzmet ИАЖ жаңғырту, бизнес-процестерді оңтайландыру, мемлекеттік қызметке қабылдау кезеңдерін цифрландыру арқылы мемлекеттік қызметті цифрландыруды қадағалайтыны белгілі болды.

«Серғазиева Айнұрдың «Ұлттық ақпараттық технологиялар» АҚ, «Зерде» ұлттық инфокоммуникациялық холдингі» АҚ және мемлекеттік қызмет көрсету саласындағы Astana Hub-та бірқатар жобаларды жүзеге асыру тәжірибесі бар» деді агенттік.

Сонымен қатар, Мемлекеттік қызмет істері агенттігі қазақстандықтардың Серғазиеваға қатысты қауесеттерге жауап берді.

«Бұқаралық ақпарат құралдарында оның этикалық нормаларды сақтамағаны туралы жарияланымдарға қатысты «Қазақстан Республикасының мемлекеттік қызметі туралы» Заңында және Мемлекеттік қызметшілердің Әдеп кодексінде көзделген шектеулер қолданыла бастағанын хабарлаймыз. Айнұр мемлекеттік қызметке тағайындалған сәттен бастап жұмыс істейді» деп атап өтті ҚР Мемлекеттік қызмет істері агенттігінің баспасөз қызметі.

Еске салсақ, 30 жастағы Айнұр Серғазиеваның Мемлекеттік қызмет істері агенттігі төрағасының орынбасары қызметіне тағайындалуы қоғамда резонанс тудырған болатын.