Мемлекеттік тапсырыс үшін пара алған Алматыдағы емхана директоры сотталды

Алматыда №10 қалалық емхананы басқарған Гүлнәр Қалыбекова екі жеке лабораториядан пара алғаны үшін жауапқа тартылды. Тергеу деректеріне қарағанда, ол бюджет есебінен төленетін, бірақ іс жүзінде орындалмаған талдауларды өткізуге рұқсат беріп келген, деп хабарлайды Orda.kz.

Қалалық соттың шешімі бойынша, «Қоғамдық денсаулық сақтау басқармасына» қарайтын аталған емхананың директоры пара алды деп танылды. Сонымен қатар «АкваЛаб» ЖШС-нің аймақтық директоры Меруерт Баймұхамбетова пара бергені үшін жауап берді.

Қалыбекова  2024 жылдың көктемінде осы қызметке келген. Ал 2025 жылдың басында емхана зертханалық және диагностикалық қызмет көрсету үшін «АкваЛаб» және «OpenHealthcare Kazakhstan» компанияларымен келісімшарт бекіткен. Бұл қызметтердің ақысы мемлекеттік тегін медициналық көмек көлеміне кіретіндіктен, бюджеттен төленуі тиіс еді.

Зертханалар жасаған талдаулардың барлығы «DamuMed» жүйесінде тіркелуі керек болатын. Бірақ тексеріс кезінде жүйеде шын мәнінде жасалмаған, артық немесе мүлде орындалмаған талдаулардың енгізілгені белгілі болды. Сол жалған талдаулар үшін қаржыны мемлекет төлеуі тиіс болған.

Тергеудің айтуынша, Қалыбекова екі лабораторияға көрсеткіштерді қолдан жоғарылатуды ұсынған. Ал ол өз тарапынан бұған көз жұма қарап отырған. Есесіне мемлекеттік тапсырыстың жалпы сомасының шамамен 15 пайызы директорға берілуге тиіс болған.

Сот үкімі

Сотта екі айыпталушы да кінәсін мойындады. Нәтижесінде бұрынғы директор 65 миллион теңгеден астам айыппұл төлейтін болды. Ал лаборатория басшысы шамамен 24 миллион теңге төлеуге міндеттелді.