Мемлекеттік қызметкер пара алғаны үшін 33 миллион теңге айыппұл төледі

Рудный қалалық соты (Қостанай облысы) «Су ресурстарын қорғау мен пайдалануды реттеу жөніндегі Тобыл-Торғай бассейндік инспекциясы» РМК су қорын мемлекеттік бақылау басқармасы басшысына қатысты қылмыстық істі қарады, деп хабарлайды Orda.kz.

Іс материалдарында анықталғандай, мемлекеттік қызметкер бау-бақша кооперативі басшысынан пара алған. Оның орнына су қорының басшысы заң бұзушылықтарға, атап айтқанда жұмыс істейтін су есептегіштерінің жоқтығына «көз жұма» тұруға уәде берген.

Ол барлығы 1,1 миллион теңге болатын пара алған.

Сотталушы өз кінәсін толық мойындады. Оның шын өкінгені мен жас баласының болуы жазаны жеңілдететін жағдай ретінде қарастырылды. Бірақ жауапкершілікті ауырлататын жайт, сотталушының мемлекеттік қызметкер ретінде антын бұзғаны болып отыр.

Сот оны мемлекеттік қызметте лауазымдарды атқару құқығынан өмір бойына айыра отырып, параның 30 еселенген сомасында, яғни  33 360 000 теңге айыппұл салды.

Үкім әлі заңды күшіне енген жоқ