«Мемлекеттік құпияның таралуы»: ҰҚК Антикор қызметкерлерін тексереді

Солтүстік Қазақстан облысындағы Сыбайлас жемқорлыққа қарсы іс-қимыл агенттігі департаменті қызметкерлері мемлекеттік құпияны жария етті деген күдікпен тексерілмек.

Солтүстік Қазақстан облысы прокуратурасы хабарлағандай, тексерісті Ұлттық қауіпсіздік комитеті жүргізеді.

«Тексеру және құқықтық баға беру мақсатында аталған факті Солтүстік Қазақстан облысы прокуратурасының Ақпараттық есепке алу кітабына тіркеліп, тексеруді ұйымдастыру және тиісті шешім қабылдау үшін Ұлттық қауіпсіздік комитеті департаментіне жолданды» делінген қадағалау органының Orda.kz-тің ресми сауалына берген жауабында. 

Оқиға «Аграрлық несие корпорациясы» АҚ Солтүстік Қазақстан облысы бойынша филиалының директоры Алмат Қожахметов сотталған сыбайлас жемқорлық ісін тергеу барысында болған. Қожахметовтың адвокаты Әділжан Мауытқанов «Антикор» қызметкерлері заңсыз әдістерді, соның ішінде куәгерге мемлекеттік құпияға қатысты бейнежазбаны көрсеткенін айтады. Сот мұны «Мемлекеттік құпиялар туралы» заңның бұзылуы деп тапты.