Мемлекет басшысы Тоқаев халықты Конституция күнімен құттықтады

Тоқаев биылғы мейрамның айрықша саяси мәнге ие екенін атап өтті. Сонымен қатар мемлекет басшысы Ата заңға өзгерістер енгізу жөніндегі жалпыұлттық референдумның нәтижесі халық бірлігі мен елімізді жан-жақты жаңғыртуға бағытталған ауқымды реформалардың барынша қолдау тапты деп есептейді.      

«Сіздерді Қазақстан Конституциясы күнімен құттықтаймын!

Біз заң үстемдігі, әділдік және жалпыға бірдей мүмкіндік қағидаттарын ұстанып, Жаңа Қазақстанды құруға кірістік. Еліміздің әрбір жауапты азаматының реформаларды іске асыруға белсене қатысып, мемлекетіміздің дамуына үлес қосатын кезі келді.  

Конституцияда белгіленген демократия құндылықтары, азаматтардың құқықтары мен бостандықтарының кепілдіктері Қазақстан Республикасы дамуының нақты стратегиялық бағдарын айқындайды.

Қолға алынып жатқан өзгерістердің басты міндеті – халықтың әл-ауқатын арттыру, мемлекеттілігімізді мейлінше нығайту және қоғамды үйлесімді дамыту. Бұл міндеттерді орындауға еліміздің әрбір азаматы атсалысуы қажет, қадірлі отандастар!

Баршаңызға шын жүректен зор денсаулық, бақ-береке тілеймін! Отанымыздың игілігі жолындағы барлық мақсатқа жете беріңіздер!» деп атап өтті Тоқаев.

Мереке 1995 жылы жалпыхалықтық референдумда Конституция қабылданған күн – 30 тамызда тойланады. Құжатқа сәйкес Қазақстан президенттік басқарудағы мемлекет болып жарияланды.