Мемлекет басшысы Қасым-Жомарт Тоқаевтың төрағалығымен Үкіметтің кеңейтілген отырысы басталды

Үкіметтің кеңейтілген отырысы еліміздің 2025 жылғы әлеуметтік-экономикалық даму қорытындыларын шығарып, алдағы кезеңге арналған негізгі міндеттер белгілейді, деп хабарлайды Orda.kz.      

Қазақстан Республикасы президенті Қасым-Жомарт Тоқаевтың төрағалығымен өтіп жатқан Үкіметтің кеңейтілген отырысында премьер-министр Олжас Бектенов экономиканың тұрақты дамуын қамтамасыз ету бағытында атқарылып жатқан жұмыстар туралы баяндады.

Олжас Бектенов мемлекет басшысы қойған ел экономикасын одан әрі нығайту міндеттеріне және Қазақстан халқына Жолдауда айқындалған стратегиялық мақсаттарға сәйкес, Үкімет 2025 жылы жүйелі өзгерістерге бағытталған бірқатар шараларды қабылдағанын атап өтті.

Салық, тарифтік және бюджет саясаты салаларында, цифрлық және құрылыс секторларында, сондай-ақ әлеуметтік салада қабылданған шешімдер экономиканың дамуын тежеп отырған құрылымдық теңгерімсіздіктерді кезең-кезеңімен жоюға бағытталған.

«Салық және бюджет реформасы нәтижесінде Ұлттық қордан нысаналы трансферттерсіз елдің үш жылдық бюджеті қалыптастырылды. Бюджет тапшылығын 2028 жылға қарай жалпы ішкі өнімнің 0,9%-ына дейін жоспарлы түрде қысқарту көзделген. Жергілікті бюджеттердің республикалық бюджетке тәуелділігі 2025 жылғы 50%-дан 2028 жылы 34%-ға дейін төмендейді», -  деді Олжас Бектенов. 

Өткізілген реформалар аясында 2025 жылдың қорытындысы бойынша экономиканың тұрақты өсімін сақтау мүмкін болғаны атап өтілді. Ақшалай мәнде ЖІӨ-нің өсімі 20,1 млрд АҚШ доллар болды.

Олжас Бектеновтің баяндауынша, жалпы алғанда, 2025 жылы жалпы ішкі өнім өсімі 6,5% болды. Экономикалық өсім негізгі салалардың жедел дамуымен қамтамасыз етілді: көлік саласы – 17,8%, құрылыс – 14,6%, тау-кен өнеркәсібі – 17,4%, өңдеу өнеркәсібі – 12,2%, сауда – 26% және ауыл шаруашылығы – 5,9%.

Бұған дейін  премьер-министр Олжас Бектенов кәсіпкерлермен кездесу өткізіп, салықтық әкімшілендіру мәселелері бойынша олардың ұсыныстарын тыңдаған болатын.

Оқи отырыңыз: 

• Қасым-Жомарт Тоқаев АИИБ президентін қабылдады 
• Тоқаев Жапонияда қарлы боран салдарынан қаза тапқандарға көңіл айтты