Мемлекет басшысы Халықаралық әйелдер күніне арналған марапаттау рәсіміне қатысты

Президент салтанатты шараға жиналған қауымды көктем мерекесімен құттықтап, әлемге сүйіспеншілікпен қарайтын, жан шуағын шашып жүретін әйелдер қауымына жылы лебізін жеткізді, деп хабарлайды Orda.kz.       

 «Әйел бір қолымен бесікті тербетсе, бір қолымен әлемді тербетеді» деген сөз бекер айтылмаған. Әйел – шаңырақтың шырағы, ұлттың ұйытқысы. Ана – тіршілік пен берекенің бастауы, адамзат бойындағы  бар ізгіліктің қайнар көзі. Ананың аялы алақаны мен шексіз мейірімі әр үйге жылылық береді. Салт-дәстүріміз бен ана тіліміздің бүгінгі күнге жетуі де, ең алдымен, аналардың арқасы. Өмірдің мәні де, тіршіліктің сәні де – сіздер! Сондықтан, бүгінгі мейрамда барша ер-азаматтар өздеріңізге ақ тілегін арнап, ықылас-ілтипатын білдіріп жатыр. Солардың ішінде мен де Мемлекет басшысы ретінде әйелдерге тілегімді, лебізімді айтып тұрмын, – деді Қасым-Жомарт Тоқаев.

Мемлекет басшысы елімізде ерлік пен елдіктің туын биік ұстаған арулардың көп екенін айтып, олардың есімі ел шежіресіне алтын әріппен жазылғанын атап өтті.

Президент биыл елімізде «Жұмысшы мамандықтары жылы» деп жарияланғанын, білікті мамандардың мәртебесін көтеру үшін белсенді жұмыстың қолға алынғанын айтты.

«Мысалы, мемлекеттік марапаттар жүйесіне жаңадан тоғыз құрметті атақ енгізілді. Бүгін осындай екі марапатты алғаш рет тапсырылады. «Қазақстанның еңбек сіңірген құрылысшысы» атағы еңбек ардагері Ольга Шелудькоға беріледі. Ал өндіріс озаты Майра Ерманова «Қазақстанның еңбек сіңірген өнеркәсіп қайраткері» атанып отыр. Осындай нағыз еңбек адамдарына бүкіл ел болып құрмет көрсетіп, оларды жан-жақты дәріптеуіміз керек. Жұмысшы мамандықтары жылының түпкі мәні де – осы, – деді Қасым-Жомарт Тоқаев. 

Мемлекет басшысы еліміздің дамуына елеулі үлес қосқан, өз саласында жоғары жетістікке жеткен бір топ әйелге мемлекеттік награда табыстады.