Мектептерге қазақтың салт-дәстүрлері туралы сабақ енгізу ұсынылды

Мәжіліс депутаттары бастауыш сыныптарда қазақтың салт-дәстүрі туралы қосымша сабақтар енгізуді ұсынды.

ҚазАқпараттың хабарлауынша, бұл туралы Атырау облысына жұмыс сапарымен келген ҚР парламенті мәжілісінің депутаты, Қазақстан халқы Ассамблеясының мүшесі Ғани Ташқараев ұстаздар және жастармен кездесуінде айтқан.

– Депутаттар арасында бастауыш сынып оқушыларына «Қазақтың салт-дәстүрі» қосымша сабағын енгізу мәселесі көтерілді. Елімізде дүниеге келген әрбір бала жастайынан қазақ халқының салт-дәстүрін, тарихын білуі керек, - деді Ғани Ташқараев.

Кездесу барысында ұлтаралық қатынас, мұғалімдердің жалақысын көтеру мәселелері талқыланды.

– Әрбір қазақстандықтың салт-дәстүрді біліп, қазақ тілінде еркін сөйлеуіне жағдай жасау бойынша жұмыстар жүргізілетін болады, - деп сендірді депутат.