«Мектептерде улы газ шашып жатыр» деген жалған ақпарат тарады

Telegram-да қолданушылар 2021 жылдың қарашасында балалар жаппай ауыра бастайды деген хабарды талқылап жатыр.

Бұл туралы Orda.kz StopFake.kz-ке сілтеме жасап хабарлады.

Хабарламада:

– Мектептер мен балабақшаларға азот оксиді мен бериллий оксиді шашылып жатыр. Балалар қарашада ауыра бастайды. Болжам бойынша, олар осылайша ата-аналарды балаларын коронавирусқа қарсы вакциналауға мәжбүрлейді. Бұл дұрыс емес, - делінген.

Ақпаратты Санитарлық-эпидемиологиялық бақылау комитеті жоққа шығарды.

– Бұл хабарлама жалған. Қазіргі уақытта мектептерде КВИ таралуын болдырмау үшін барлық шаралар қолданылды, 379 540 мұғалім мен мектеп қызметкерлері вакциналанды. Бұл барлық орта білім беру қызметкерлерінің 96 пайызы. Оқушылар арасында вирустың тарамауы үшін қажетті алгоритм әзірленді, - деді санитарлық-эпидемиологиялық бақылау комитетінің ресми өкілі Ержан Байтанаев.

Сонымен қатар ол біле тұра жалған ақпарат таратушылар Қылмыстық кодекстің 274-бабы бойынша жауапқа тартылатынын еске салды. Ол 3 мың АЕК-ке дейін айыппұл, 800 сағатқа дейін қоғамдық жұмысқа тарту, 3 жылға дейін бас бостандығын шектеу немесе сол мерзімге бас бостандығынан айыру түріндегі жауапкершілікті қарастырады.

Айта кетсек, азот оксидін байқаусыз шашу мүмкін емес. Азот оксиді - бұл қызыл қоңыр, кейде сарғыш, өткір иісті газ. Оны байқамау мүмкін емес.