Актер, кинопродюсер Нұртас Адамбай еліміздегі мектепте хиджаб киюге тыйым салынғанына қарсы екенін айтты.

Бұл туралы Адамбай Арманжан Байтасовқа берген сұхбатында мәлімдеді.

Оның сөзінше, хиджаб – оны кигісі келген қыз бен Алланың арасындағы қарым-қатынас, сондықтан оған ешкімнің араласуға құқығы жоқ. Кинопродюсер хиджабқа тыйым салынғанымен, қысқа етекті белдемше киюге рұқсат етілгеніне қынжылды.

– Алла орамал тағуды әйелдердің құқығын таптау үшін емес, керісінше, оларды қорғау үшін бұйырған. Оранған әйелдер өзін Алланың қамқорлығында жүрміз деп сезінеді.

Мектепте хиджаб киюге тыйым салу дұрыс емес деп санаймын. Өйткені бұл адамның құқығын бұзады. Біздің елде заң бойынша дін ұстану еркіндігі бар. Мектеп оқушысы орамал таққысы келсе, ол оның Алламен қарым-қатынасының өлшемі. Ол араға килігуге болмайды, – деді Адамбай.

Осы ретте актер екі қыз тәрбиелеп отырған имам туралы айтып берді. Оқу орындарында орамал тағуа рұқсат етілмегендіктен, дін қызметкерінің шарасыз күйде отырғанын жеткізді.

– Бір күні имаммен сөйлестім. Оның ислам дініне қатты берілгенін көрдім. Оның екі қызы бар еді. «Мемлекеттік мектептерде хиджаб киюге тыйым салды. Жарайды, жеке мектепке ауыстырдық. Кейін ол жерде де тыйым салды» деді. Ол көзіне жас ала отырып: Менің басқа елге кетуге мүмкіндігім жоқ. Енді мен не істеуім керек? Қызым: «Әке, неге мен орамал таға алмаймын?»  деп жылайды.

Қыздың орамал таққаннынан кімге зиян тиеді? Орамал тақпайтын басқа қыз ол үшін өзін жаман сезіне ме? Ол бір қорқынышты маска киіп алып, адамдарды қорқытып жүрген жоқ қой, – деді кинопродюсер.

Осы орайда Адамбай оқу орындарында, қоғамдық жерлерде қысқа етекті белдемше киюге тыйым салынбағанына қынжылды. Оған айналадағы барша еркектердің назары ауатынын, сол арқылы күнәға бататынын түсіндірді.

Бөлісіңіз: