Мектепте туберкулез шықса да, оқушылар қашықтан оқуға жіберілмей жатыр

Қарағанды облысы Бұқар-Жырау ауданына қарасты Доскей ауылындағы Ахмет Байтұрсынұлы атындағы мектептің ата-аналары дабыл қақты. Oқушылардың бірінен туберкулез анықталғанына қарамастан, оқу процесі қалыпты режимде өтіп жатыр, деп хабарлайды Orda.kz.

Бұл жайлы «Вечерняя Караганда» газеті хабарлады. Ата-аналардың айтуынша, мектеп әкімшілігі байланысқа шықпайды, ал жергілікті билік жағдайға қатысты түсініктеме бермеген. Тек мессенджер арқылы жіберілген хабарламада жағдай бақылауда екені айтылған. Алайда сол хабарламада аудандағы басқа мектептерде де осындай жағдайлардың тіркелгені жазылған.

Балаларының денсаулығына алаңдаған ата-аналар оқушыларды уақытша қашықтан оқытуға көшіріп, мәселенің анық-қанығы белгілі болғанша сақтық шараларын күшейтуді талап етіп жатыр.

Дегенмен әзірге мектепті жабу немесе онлайн оқытуға көшіру туралы ресми шешім қабылданған жоқ.

Денсаулық сақтау басқармасы қашықтан оқытудың қажеті жоқ екенін, оқитын орындарда дезинфекция жүргізілгенін мәлімдеді.

«Алдын алу тексерісі барысында бұған дейін туберкулезбен есепте тұрған науқастан аталған аурудың қайта өршуі анықталды. Бұл жағдай жасөспірімнің жас ерекшеліктеріне байланысты болуы мүмкін, себебі осы кезеңде гормоналды өзгерістер орын алып, иммунитет төмендейді.
Қазіргі уақытта пациент ауруханада қажетті ем қабылдап жатыр. Оқитын орнында қорытынды дезинфекция жүргізілді. Барлық байланыста болған адамдар тексерілді, жұқтыру жағдайлары анықталған жоқ. Оқушылардың ата-аналарымен санитарлық-гигиеналық талаптарды сақтау және инфекциядан қорғану шаралары бойынша нұсқаулық өткізілді. Қашықтан оқытуға қажеттілік жоқ», — деді денсаулық сақтау басқармасы.