Мектепте намаз оқыған бала. Ғани Бейсембаев не дейді?

Оқу-ағарту министрі Ғани Бейсембаев мектеп секілді мекемеде намаз оқыған оқушыларға байланысты пікір білдірді, деп хабарлайды Orda.kz порталы.

Үкімет отырысынан кейін журналистер «Қателеспесем Шымкент қаласы әкімінің орынбасары (Сәрсен Құранбек – ред.) «Құрметті имамдар, сіздерден өтінемін, әлі буыны қатпаған жас баланы мешітке шақырмаңыздаршы» деп айтып еді. Жалпы осындай тенденция қалыптасқанын байқаймыз. Оқу-ағарту министрі балаларды ағартуға емес, қарайтуға жұмыс істеп жатқан жоқ па? Оқушылардың мешітке баруы неге көбейіп кетті?» деп сұрақ қойған болатын.

Бұған жауап ретінде министріміз былай деді.

«Жалпы оқу-ағарту министрлігінің негізгі басты мақсаты біздің балаларымызға сапалы білім мен саналы тәрбие беру екенін мен үнемі айтып жүрмін. Сондықтан да барлық жұмыс тиісінше жүріп жатыр. Біз балаларымыздың осы бағыттағы мәселесін шешу бойынша іс-шаралар қабылдап жатырмыз. Ал енді жекелеген өңірлердегі кейбір мәселелер бүкіл оқу-ағарту саласындағы балаларды қарайтуға бағытталып жатыр деп айтуға болмайды. Біз кез келген мәселені шыққан жерінде анықтап, бұл бағытта тиісті жұмыстар жүргізіп отырамыз. Қазір өзіңіз білесіз, 1 қыркүйектен бастап біртұтас тәрбие бағдарламасы қабылданды. Балалардың тұлға болып қалыптасуына бағытталған үлкен іс-шаралар ұйымдастырылып жатыр. Сондықтан бұл жерде тиісінше балалардың сапалы білім алуына барлық жағдай жасап жатырмыз», – деді министр.