Мектепте хиджаб киюге түбегейлі қарсымын – Светқали Нұржан

Белгілі ақын Светқали Нұржан сұхбат беріп, елдегі діни ахуал мен түрлі ағымдар туралы пікір білдірді.

– 2008 жылы жылы «Ай көрдім, аман көрдім» деген памфлет жазғанмын. Ол Бекболат Тілеуханов туралы. Сол кезде кемеліне келіп, Атасудағы әкесінің бейітін құлатқан кезі еді. Қазақтың жолдан жұқтырған жаман қасиеттері жетерлік. Тілеуханов пен Тазабекке келгенде қазақ көңіл алалығын жасаған жоқ. Қолдары жеткен биікке көтерді. Үлкен ағаларымыз тілектерін жазды. Әбіш Кекілбаев «Жырау» деген керемет толғау арнады. Қадыр Мырза Әли «Тілеуханов болмаса қазақ құрқұлақ ауруына ұшырар еді» деген пікірлер айтты. Ал енді соңында не болды? Алланың алтын тағы ұлтыңның алақаны ғой. Сол тақты тастап, жат идеологияға кетсең туған отаның жат, - деді ақын.

Қоғам қайраткері министр Аймағамбетовтың «оқушыларға мектепке хиджаб киіп келуге рұқсат беру керек шығар» деген ойына қатысты пікірін айтты.

– Хиджаб кию мәселесіне түбегейлі қарсымын. Онда әлгі деструктивті ағымдардың құбыжық саясатын мойындау болады. Перзентін қара жамылдырып қойғанды қай ата-бабаңнан көрдің? Қазақта әр жастағы қыз баланың киетін киімі бар. Сәнді тақиясын кигізсін. Сосын қазақтың қызы мен әйелі мен жұтындырып орамал тақпайды. Бетімізді қанша ашып жүргенмен, Құдайдың алдында жүзіміз жарық халықпыз. Бірінші сананы тәрбиелеу керек, - деді Светқали Нұржан «Сұрауы бар» ютуб арнасына берген сұхбатында.