Мектеп оқушыларының жаппай улануына қатысты іс сотқа түсті

Іс бойынша 80 жәбірленуші мен бір айыпталушы – асхана аспазы бар.

Ол Қылмыстық кодекстің 304-бабының 1-бөлігі ("Санитарлық ережелерді немесе гигиеналық нормаларды бұзу") бойынша сотталып жатыр. Улануға Staphilococcus aureus тобындағы бактериялар себеп болған. 

Былтыр қараша айында Жамбыл облысы Байзақ ауданының орталық аудандық ауруханасына 40-қа жуық науқас түсті, олардың көпшілігі – 7-10 жас аралығындағы бала, барлығы Нығметулла Киікбаев атындағы орта мектепте оқиды. 

Зардап шеккендердің саны 80 адамға жетсе де, мердігерлер 2024 жылы қызмет көрсетуді жалғастырады. Осы оқиға болған Нығметулла Киікбаев атындағы мектеп-гимназияның өзі бұл компанияға тамақ үшін 76 млн теңге төлейді.