Мектеп-интернат директоры мүгедек қызды жеті жыл бойы зорлап келген

Шымкенттегі №2 арнаулы әлеуметтік қызметтер көрсету орталығының жұмысында заң бұзушылықтар анықталды, деп хабарлайды Еңбек және халықты әлеуметтік қорғау министрлігі.

Жоспардан тыс тексеруге жергілікті тұрғын Әлия Мамутованың мүгедек қызын интернатта жеті жыл бойы зорлап келгендігі туралы мәлімдемесі себеп болды. Тексеру нәтижелері орталық шенеуніктері тарапынан бақылаудың жоқтығын көрсетеді.

«Кейбір қызмет алушылардың жеке жұмыс жоспарлары оңалтудың жеке бағдарламасын ескермей жасалды. Қызмет алушыларға жұмсақ тауарлық-материалдық құндылықтар және киім-кешек толық берілмейді. Қызмет алушылардың киімдеріне этикетка ілінбеген. Асханаға бақылау жүргізу кезінде де заң бұзушылықтар анықталды», - делінген хабарламада.

Жалпы, Еңбек және халықты әлеуметтік қорғау министрлігінің бастамасымен жүргізілген тексерулерден кейін балаларға арналған 20 медициналық-әлеуметтік мекеменің басшыларына қатысты жазалау шаралары қолданылды. Нұр-Сұлтан мен Шығыс Қазақстан облысындағы қарттар үйінің төрт басшысы қызметінен босатылды. Айыппұлдар Шымкент қаласының №6 орталығы мен Солтүстік Қазақстан облысының «Арман» арнайы әлеуметтік қызмет көрсету орталығы директорларына қатысты қолданылды.

Атырау, Жамбыл, Қостанай және Қарағанды ​​облыстарындағы төрт орталық директорларына қатысты сөгіс түрінде тәртіптік жаза қолдануды ұсынды. Алматы және Маңғыстау облыстарының орталықтарында бірінші басшыларды ротациялау ұсынылды.