Мектеп директорлары жалақыларында қандай өзгеріс болады?

ҚР Білім және ғылым министрлігі мектеп директорларының жүктемесіне қарай олардың жалақыларының деңгейін қайта қарауды дұрыс деп санайды. Сонымен қатар мұғалімдерді мектепке қабылдау ережесін өзгерту керек.

Бұл туралы Orda.kz хабарлады.

– Қазіргі таңда мектеп басшыларына еңбекақы төлеу мәселесі өткір болып тұр. Айлық жалақының қазіргі деңгейінде бәсекеге қабілетті директорлар көшбасшы болып жұмыс істеуге және үздік мұғалімдер директор не завуч болуға қызығушылық танытпайды, - деді Білім және ғылым министрі Асхат Аймағамбетов.

Оның айтуынша, директорлардың жалақысы мұғалімдерге қарағанда төмен болған жағдайлар жиі кездеседі. Сондықтан, Білім министрлігі мектеп директорларына еңбекақы төлеу жүйесіне түзетулер енгізуді жоспарлап отыр.

– Менің айтайын дегенім, біз 40 оқушысы бар директорға және 1200-2000 оқушысы бар директорға бірдей жалақы төлейтін болсақ. Әлбетте, мұнда жүктеме мен жауапкершілік дәрежесі әр түрлі. Біз бұл туралы айттық және министрлік тиісті шешім дайындап жатыр, - деп қосты министр.

Сонымен қатар, 2022 жылдың қаңтарынан бастап балабақша, мектеп және колледж мұғалімдерінің жалақысы 25%-ға өседі. Бұл ретте Аймағамбетов мұғалімдерді іріктеуді өзгерту туралы жаңа бұйрыққа қол қойып үлгерді.

– Егер бұрын мұғалімдерді жұмысқа директор қабылдаса, енді ол электронды форматтағы конкурс арқылы жүзеге асатын болады. Өлшеуге болатын анық көрсеткіштер, критерийлер бар және осы көрсеткіштер мен критерийлер бойынша мектеп пен комиссия мұғалімдерді жұмысқа қабылдау туралы шешім қабылдайды, - деді Білім министрлігінің басшысы.