Мектеп дәретханаларында бейнекамера бола ма?

Білім министрлігі мектеп әжетханаларында бейнекамералар орнатылуы мүмкін екенін жоққа шығармайды. Мұндай ұсыныс Алматыдағы элиталық оқу орындарының бірінде бала зорланды деген оқиғадан кейін айтылды, деп хабарлайды Orda.kz тілшісі.

Сенат отырысында Білім министрі Ғани Бейсембаев мұндай идеяның жүзеге асуын жоққа шығармайтынын мәлімдеп, сарапшылардың пікірінсіз жұмыс істеу мүмкін еместігін айтты.

«Әрине, дәретханаларға камера орнату мәселесі сарапшылармен және мамандармен талқылауды қажет етеді, өйткені бұл адамның жеке өміріне қол сұғылмаушылық құқығына әсер етуі мүмкін. Дегенмен бәрін мұқият зерделеу керек. Бір мәселе шешілсе, екіншісі пайда болуы мүмкін. Сондықтан бәрін таразылап, шешім қабылдаймыз», – деп жауап берді Бейсембаев.

Министр Алматыда бала зорлау ісі қазір Балалар құқығын қорғау комитетінің бақылауында екенін айтты.

Бұған дейін департамент комитет төрағасы зардап шеккен баланың анасымен, сондай-ақ халықаралық мектеп басшылығымен байланыста екенін хабарлаған болатын.