Мектеп әжетханасындағы қақтығыс өлімге әкелді: Таразда 9-сынып оқушысы қамалды

Таразда №47 мектептің әжетханасында болған жанжал оқушы өлімімен аяқталды. Үзіліс кезінде жасөспірімдер арасында төбелес шығып, бір бала ішінен алған соққыдан көз жұмды. Оқиғаға қатысты 9-сынып оқушысы екі айға қамауға алынды, деп хабарлайды Orda.kz.

Тергеу сотының шешімімен күдікті жасөспірім ішкі істер басқармасының уақытша ұстау изоляторына қамалды. Бұған дейін полиция істің 106-бабының 3-бөлігі «қасақана ауыр зиян келтіру, абайсызда жәбірленушінің өліміне әкелу» бойынша іс тергеліп жатқанын мәлімдеген еді.

Жамбыл облысының әкімі Ербол Қарашөкеев жаңа оқу жылы басталғалы кәмелетке толмағандар арасындағы ауыр қылмыстардың көбеюі алаңдататынын айтты.

Жиын қорытындысы бойынша облыс әкімінің орынбасары Серік Сәлімұлына сөгіс берілді. Сондай-ақ, Тараз әкімі Бақытжан Орынбековке, Шу ауданының әкімі Бақытжан Жәнібековке облыстық білім басқармасының басшысы Нұрбек Оршыбековке, Тараз әкімінің орынбасары Ұлан Сламбековке және Шу ауданы әкімінің орынбасары Найман Сұлтанбаевқа қатаң сөгіс жарияланды.

Сонымен қатар, облыс әкімі білім басқармасына Тараз қаласы мен Шу ауданының білім бөлімдері басшыларының қызметіне сәйкестігін тексеруді тапсырды.

Еске сала кетейік, бірнеше күн бұрын Жамбыл облысының Шу ауданында да қайғылы оқиға болды. Онда 10-сынып оқушысы футбол ойынынан кейінгі төбелестен соң көз жұмған еді.